 |
| សិស្សមកពីសាលាគោលដៅធ្វើបទបង្ហាញអំពីរូបិយប័ណ្ណនៃបណ្តាប្រទេសអាស៊ានក្នុងសិក្ខាសាលារបស់គម្រោង IBECនៅភ្នំពេញ។ រូបថតអឿសាវីនអង្គការខេប |
ភ្នំពេញៈគម្រោងកែលម្អអប់រំកម្រិតមូលដ្ឋាននៅកម្ពុជា (ឬ
IBEC) ត្រូវបានចាប់ផ្តើមនៅក្នុងឆ្នាំ២០០៩
ស្របតាមការអភិវឌ្ឍគោលនយោបាយបំណិនជីវិតរបស់ក្រសួងអប់រំនៅឆ្នាំ
២០០៦
ដែលនៅពេលនេះកម្មវិធីបំណិនជីវិតដែលទទួលជំនួយសប្បុរសធម៌ពីពលរដ្ឋ
អាមេរិកតាមរយៈទីភ្នាក់ងារសហរដ្ឋអាមេរិកដើម្បីការអភិវឌ្ឍអន្តរជាតិ
(USAID) បានប្រតិបត្តិការដោយអង្គការអប់រំពិភពលោក (WE)
សហការជាមួយអង្គការសកម្មភាពសំរាប់បឋមសិក្សានៅកម្ពុជា (KAPE)
អនុវត្តសាកល្បងអន្តរាគមន៍បែបច្នៃប្រឌិតក្នុងការគាំទ្របង្កល
ទ្ធភាពនិងពង្រឹងគុណភាពអប់រំ
បានដើរតួនាទីយ៉ាងសំខាន់នៅក្នុងការជម្រុញ
ឲ្យកុមារចូលរៀនមកទល់នឹងពេលនេះ
គម្រោងនេះបានជួយកុមារកម្ពុជាប្រមាណជាង១សែននាក់ស្ថិតក្នុងខេត្ត
ចំនួន៣។
លោកអឿនសាវីនមន្ត្រីទំនាក់ទំនងអង្គការKAPEបានឲ្យដឹងថាគម្រោងIBEC
បានទទួលការឧបត្ថម្ភពីសហរដ្ឋអាមេរិកដោយចាប់ផ្តើមនៅចុងឆ្នាំ២០០៩
ផ្តោតលើសិស្សចាប់ពីថ្នាក់ទី១ ដល់ថ្នាក់ទី៩
និងត្រូវបញ្ចប់វិញនៅចុងឆ្នាំ២០១៤
ដោយប្រើប្រាក់គម្រោងប្រមាណចំនួន១០លានដុល្លារសហរដ្ឋអាមេរិក។
លោកបានបន្តថា គម្រោងនេះត្រូវបានធ្វើឡើងនៅក្នុងខេត្តចំនួន ៣
គឺខេត្តកំពង់ចាម ក្រចេះ និង ខេត្ត សៀមរាប
ដើម្បីបង្កភាពងាយស្រួលធ្វើយ៉ាងណាឲ្យកុមារទាំងអស់បានចូលរៀន
និងត្រូវឲ្យពួកគេទទួលបានគុណភាពនៃការអប់រំកាន់តែប្រសើរ
តាមកម្មវិធីបំណិនជីវិត។
នៅក្នុងសិក្ខាសាលាមួយស្តីអំពីការអនុវត្តល្អរបស់គម្រោង IBEC
លោកអឿ សាវីន បាននិយាយថា៖ «មកទល់នឹងពេលនេះ គម្រោង IBEC
បានជួយសិស្សជាង ១ សែននាក់ នៅក្នុងខេត្តចំនួន ៣ គឺ សៀមរាប ក្រចេះ
និង កំពង់ចាម។ គម្រោង IBEC
បង្កឲ្យមានកម្មវិធីបំណិនជីវិតជួយបន្ថែមទៅលើកម្មវិធីសិក្សា
មានស្រាប់របស់ក្រសួង កម្មវិធីអាហារូបករណ៍ សម្រាប់សិស្សក្រីក្រ
កម្មវិធីបណ្តុះបណ្តាលបច្ចេកទេសគ្រូកុមារមេត្រី
ការគ្រប់គ្រងរដ្ឋបាលសាលារៀន និងភាពជាអ្នកដឹកនាំ
និងការចូលរួមពីសហគមន៍ការបង្កើតសៀវភៅបំណិនជីវិតចំនួន ៣០
មុខជួយដល់ក្រសួងអប់រំ ជាដើម»។
លោកបានបន្តថា៖«គម្រោងនេះ
ដើម្បីជួយជំរុញវិស័យអប់រំនៅកម្ពុជាធ្វើយ៉ាងណាឲ្យមានការអភិវឌ្ឍ
បានឆាប់រហ័ស ជាក់ស្តែងអ្វីដែលសំខាន់បំផុតនោះ
គឺកម្មវិធីបំណិនជីវិតដោយផ្តោតសំខាន់លើសាលាបឋមនិងមធ្យមសិក្សាដែល
កម្មវិធីនេះបានផ្តល់លទ្ធភាពឲ្យកូនសិស្សចេះចំណេះដឹងទូទៅផង
និងចេះបំណិនជីវិតផងដូចជា នៅពេលកំពុងរៀនពួកគេអាចចេះ
ជំនាញកុំព្យូទ័រ ការពិសោធវិទ្យាសាស្ត្រ កាត់ដេរ កាត់សក់
ជួសជុលកង់ ម៉ូតូ ការចិញ្ចឹមមាន់ ត្រី ដាំបន្លែ បណ្តុះផ្សិត
វិធីធ្វើម្ហូប ជាដើម»។
តាមរយៈរបាយការណ៍ក្រសួងនិងអង្គការជាតិនិងអន្តរជាតិនានាបានឲ្យដឹង
ថា
បញ្ហាការចូលរៀនរបស់កុមារនិងការបោះបង់សាលារៀននៅតែជាក្តីកង្វល់។
ប៉ុន្តែតាមរយៈការអនុវត្តលើគម្រោងកែលម្អអប់រំមូលដ្ឋានកម្រិត
មូលដ្ឋាននៅកម្ពុជាពិសេសកម្មវិធីបំណិនជីវិតនៅក្នុងខេត្តចំនួន ៣
បានឲ្យដឹងថា គម្រោងទទួលបានជោគជ័យ ៩០ ភាគរយ។
លោក ហ៊ិន ស៊ីហួន ប្រធានអង្គការ KAPE ដែលមានការិយាល័យធំនៅ
ខេត្តកំពង់ចាម បានឲ្យដឹងថា នៅក្នុងខេត្តកំពង់ចាម
ជាខេត្តមួយដែលមានប្រជាជនច្រើន
ហើយបញ្ហាពលកម្មលើកុមារនៅតាមបណ្តាស្រុកមួយចំនួនក៏មានច្រើនដែរ
ក្នុងនោះមានពលកម្មក្នុងចម្ការកៅស៊ូ ចម្ការដំឡូង រោងចក្រ និង
ចម្ការថ្នាំ ជាដើម។
បញ្ហាទាំងនោះជាការដាក់គម្លាតឲ្យកុមារស្ថិតនៅឆ្ងាយពីការសិក្សា។
លោកមានប្រសាសន៍ថា៖«បញ្ហាគ្រួសារធ្វើឲ្យកុមារមួយចំនួនដែលមាន
វ័យបំពេញពលកម្មត្រូវគេអូសទាញទៅប្រើជាកម្លាំងដើម្បីរកប្រាក់»។
លោកបានបន្តថា៖
«ការអូសទាញ[ត្រឡប់មករៀនវិញ]ពួកយើងពិតជាជួបការលំបាក
តែយើងបានធ្វើការជាប្រព័ន្ធដោយសហការជាមួយភូមិឃុំដើម្បី
ផ្សព្វផ្សាយរឿងនេះ។
តែដើម្បីឆ្លើយតបនឹងបញ្ហាពិបាកខ្លាំងគឺយើងនឹងមានការផ្តល់
អាហារូបករណ៍ និងការឧបត្ថម្ភជាអាហារពេលព្រឹកជាដើម»។
លោកបានបញ្ជាក់ថា៖ «ក្រោយពេលយើងរៀបចំផ្តល់អាហារូបករណ៍
និងអនុវត្តកម្មវិធីបំណិនជីវិតឲ្យពួកគេធ្វើឲ្យយើងអាចកាត់បន្ថយការ
បោះបង់ចោលការសិក្សាបានច្រើន
ហើយយើងអាចប្រមូលកុមារឲ្យមកចូលរៀនបានប្រមាណ៩០ភាគរយ»។
គួរបញ្ជាក់ថា
ដើម្បីជំរុញឲ្យការប្រមូលកុមារចូលរៀនបានទាំងអស់គ្នាគម្រោងកែលម្អ
អប់រំកម្រិតមូលដ្ឋាននៅកម្ពុជា
បានផ្តល់អាហារូបករណ៍និងបណ្តុះបណ្តាលដល់គ្រូដែលស្ថិតក្នុងតំបន់
ដាច់ស្រយាលនោះបានចំនួន៣៦០នាក់
និងបានចងក្រងឯកសារបំណិនជីវិតចំនួន៣០មុខវិជ្ជា៕
ប្រភពពី៖
ភ្នំពេញប៉ុស្តិ៍
